Får spele turnering på heimebane: – Kunne ikkje seie nei

Fredag går tennisturneringa Ultimate Tennis Showdown (UTS) av stabelen i Telenor Arena på Fornebu. Det er så nært heimebane ein får det for norske Casper Ruud.

– Det blir gøy å spele her. Det er jo ikkje ein tennisklubb her på Telenor Arena, så det er første gong vi speler tennis her inne nokon sinne, heilt sidan det blei sat opp. Det er gøy å kunne vere ein del av det, seier Ruud til Discovery.

Fleire tennisspelarar vel heller å spele på ATP-touren denne veka, blant anna «The Golden Swing» i Sør-Amerika som Ruud har spelt fleire gongar tidlegare, men for nordmannen var det ingen tvil denne gongen:

Tennisturneringa UTS opererer med heilt andre reglar enn ei vanleg ATP-turnering. I staden for å spele til tal sett, speler ein heller på tid. I tillegg er det berre lov å serve ein gong, sjølv om ein ikkje får til førsteserven, og det er også bonuskort involvert.

– Det er litt annleis struktur på kampane, og ein slags ide om å prøve å gjere det meir appellerande til ein yngre generasjon, forklarar Ruud.

Ruud skal i alle fall spele tre kampar under turneringa i Oslo. Éin kamp på fredag og to kampar på søndag.

– Skulle eg gått vidare til semifinale, så blir det på søndag. Det blir ei spennande helg med mykje tennis forhåpentlegvis.

Førre helg spelte den norske tennisstjerna Davis Cup i Gjøvik. Han legg ikkje skjul på at det har vore godt med ein liten periode heime i Noreg.

– Eg liker jo å reise, men nokre gonger blir det litt vel mykje når det er veke etter veke etter veke. Tennissesongen er veldig lang, det er eg blitt inneforstått med no, seier Ruud og ler.

– Det blir først ein tur til Mexico, så eit par veker til USA, før eg skal tilbake til Europa og spele på grus. Det blir ein spennande og kjekk vår og sommar som kjem, og forhåpentlegvis ein bra sesong.

Månadar borte frå heimlandet gjer at Ruud set ekstra stor pris på tida heime.

– Ein skal nyte dei periodane ein har heime. Det har vore deileg å få vere her i nokre veker no.