Uno-X-ryttaren tok historisk triumf – trur han kan følge opp bragda tysdag

På den andre etappen av Critérium du Dauphiné kunne Uno-X-ryttar Magnus Cort krysse mållinja først etter ein spurt opp Col de la Loge. Sigeren var Uno-X sin første siger på World Tour-nivå.

– Av det Uno-X har vunne er dette på eit heilt anna nivå. Det er utvilsamt det klart største dei har vunne, seier Discoverys sykkelkommentator Theis Magelssen.

Magelssen peiker ikkje berre på rittet si rangering, men også på det sterke startfeltet. På startlista stod store namn som Primoz Roglic, Remco Evenepoel og Juan Ayuso.

Kommentatoren er svært imponert over korleis laget løyste etappen.

– Det er ikkje noko tilfeldigheit. Det er bokstavlegtalt Uno-X som køyrer inn og samlar når ingen andre klarer det. Det er ikkje berre ein Cort-siger, men ein Uno-X-siger.

Med sigeren kunne Cort også ta over leiartrøya frå landsmannen Mads Pedersen. Han har fire sekund ned til Primoz Rolgic og seks sekund ned til Matteo Jorgenson før tredje etappe.

– Eg trur han kan vinne tysdag også, men tempoen etterpå blir nok for tøff. Det er ikkje heilt ein Cort-tempo, og han har ingenting på Roglic. Men herregud så sterk han såg ut på andre etappe.

Før etappe tre innrømmar Cort at han skal forsøke å halde på leiartrøya.

– Det er kjempefint å ha den gule trøya. Planen tysdag er sjølvsagt å behalde trøya, og så får vi sjå om eg kan gå for nok ein etappesiger.

Critérium du Dauphiné varer fram til søndag, og ryttarane skal blant anna gjennom to fjelletapper.

– Fjelletappene blir tøffe, og det kan bli brot der. Leknessund såg sterkt ut måndag, så om han hamnar i riktig brot på fjelletappene, kven veit kva som kan skje?

Uno-X står med tre sigrar på tre dagar: Alexander Kristoff på laurdag, Jonas Abrahamsen på søndag og Cort på måndag. Magelssen trur det er fleire grunnar til at det plutseleg har lausna for det norsk-danske sykkellaget.

– Ketchupeffekten er reell: Når det først lausnar, så lausnar det. I tillegg har jo Uno-X styrka laget. Dei har lenge hatt eitt av dei yngste sykkellaga, og no har alle unggutane blirr eitt år eldre, og tatt eitt nivå ekstra. Om ein har seks-sju ryttarar i den prosessen, så blir det ein stor breidde etter kvart. Det er vel ein blanding av større breidde, flyt og flaks.

I tillegg har nokre av ryttarane vore på høgdesamling.

– Både Abrahamsen og Cort var der, men ikkje Kristoff. Dei har gjort eit godt treningsarbeid over lengre tid, og i den siste perioden inn mot Tour de France har dei verkeleg gjort jobben.