Norsk sykkellag søker om å ta neste steg: – Har trua

Lillehammer Cykleklubb (LCK) har bestemt seg for å søke UCI om kontinentallag-lisens for deira landevegslag på seniornivå.

Det bekreftar laget i ei pressemelding.

– Med få kontinentallag i Noreg er det no tid for å etablere eit til. Vi ønsker å legge til rette for ryttarane som satsar her på Lillehammer, seier trenar Martin Olsen til Discovery.

Olsen fortel at dei har fått godkjenning av dokumentasjon til søknaden av Noregs Cykleforbund og at den vidare behandlinga no er hos UCI.

– Vi ventar spent på tilbakemelding og har tru på at vi får godkjent status.

Ein slik lisens vil gjere at sykkellaget kan bli invitert til alle UCI-ritt på kotinentaltouren. Sykkellaget kan dermed søke om deltaking i Tour of Norway og Arctic Race, med håp om å få plass i den nasjonale kvoten. Samtidig kan dei søke om å delta i fleire internasjonale UCI-ritt utanfor landegrensene.

– Vi ser at vi som klubb må jobbe annleis for å kunne gje våre eliteryttarar på landeveg eit godt sportsleg tilbod. Når vi no har eit engasjert og kompetent støtteapparat som ønsker å ta steget opp, og ryttarar er samstemte om at dei ønsker å gjere det som trengs, var tida moden for å sende søknaden, seier styreleiar i klubben Eirik Haagensen i pressemeldinga.

– Eit UCI-lag frå LCK mogleggjere «matching» på eit profesjonelt nivå. Det er avgjerande for at eg kan utvikle meg vidare mot måla mine som syklist, seier ryttar på laget Kasper Haugland.

– At LCK no søker om å opprette eit lag med profesjonell status viser at klubben ønsker å leggje til rette for å drive med toppidrett her på Lillehammer, seier Herman Emil Eriksen.

Kontinetallaga er på det tredje høgste nivået innan sykkelsporten, nivået under ProTeam-laga.

I Noreg er det allereie to lag på same nivå: Team Coop Repsol og Uno-X Development Team. I 2015 var det heile seks norske sykkellag på same nivå.

Uno-X Mobility, som er laget som deltok under Tour de France, er på ProTeam-nivå. Nyleg blei det delt ut World Tour-lisens for dei tre neste sesongane. Uno-X sitt herrelag søkte om lisens, men fekk ikkje plass. Damelaget til Uno-X heldt derimot på sin World Tour-lisens også neste sesong.