Norsk ryttar død etter ulykke

Det stadfestar både Team Coop-Repsol og arrangøren i ei pressemelding.

– André Drege krasja under nedstigninga av Großglockner og pådrog seg alvorlege skadar, skriv arrangøren.

Arrangøren skriv vidare at myndigheitene etterforskar årsaka til ulykka.

Etappen var den nest siste etappen av rittet.

– Arrangørane informerte dei pårørande med ein gong. Etter etappen var det eit møte med alle dei 20 lagsjefane og UCI. Det blei einstemmig vedtatt at André sin familie, så vel som teamet, vil ta avgjerda saman med organisasjonen om siste etappe går søndag. Det vil bli kunngjort søndag, skriv arrangøren i ei pressemelding.

Etappen blei vunne av italienaren Filippo Ganna, men prisutdelinga blei avlyst på grunn av den tragiske hendinga. Ifølge det austerrikske nyheitsbyrået APA visste ingen av deltakarane om ulykka før etappen var over.

25-åringen stod med sju sigrar allereie i år, og skulle sykle for World Tour-laget Jayco Alula frå og med neste år.

Fleire sykkellag uttrykker også sorg over Drege på sosiale medium.

– Vi er hjarteknust over nyheita om vår kjære kollega, som hadde ein fantastisk karriere framfor seg, skriv Intermarché-Wanty på X.

– Vi sender all vår kjærleik og styrke til vennar, familie og lagkameratane i Team Coop-Repsol, skriv Lidl-Trek.