Cancellaras sykkellag forsterkar – hentar fleire store namn

Tudor Pro Cycling hentar fleire store namn til laget.

Det skriv sykkellaget i ei pressemelding.

Dei nye tilskota til laget er Matteo Trentin, Alberto Dainese, Michael Storer, Marius Mayrhofer, Florian Stork, Alexander Krieger og Hannes Wilksch.

Trentin går til Tudor Pro Cycling frå UAE Team Emirates, der han hadde ei toårskontrakt frå 2021. Han vart europeisk meister i 2018, og tok sin tredje individuelle Tour de France-etappesiger i 2019. I årets Tour de France var 8.plass hans beste plassering.

Alberto Dainese har to etapppesigrar i Giro d'Italia, i 2022 og 2023. Han sykla i Tour de France i 2022, der han fekk pallplassering på den 19. etappen. Den italienske syklisten kjem frå Team DSM i lag med Marius Mayrhofer og Florian Stork.

Michael Storer har det siste året sykla for Groupama-FDJ, medan Alexander Krieger har vore lagkamerat med Mathieu van der Poel og Jasper Philipsen i Alpecin–Deceuninck.

21-åringen Hannes Wilksch har sykla for Tudor Pro sitt U23-lag, men tar no steget opp til profflaget.

Laget vil i 2024 bestå av totalt 27 ryttarar.

Tudor Pro Cycling er eit sveitsisk lag. I april 2022 tok den tidlegare syklisten Fabian Cancellara eigarskap over laget, og gjekk saman med den sveitsiske klokkeprodusenten Tudor for å sponse laget.

I desember 2022 annonserte UCI at sykkellaget vart tildelt pro-team-lisens frå og med 2023-sesongen.