Avlyser Holmenkollen-renn

Torsdag skulle kvinnene gå normaldistanse i verdscupen i Holmenkollen. Det har blitt avlyst på grunn av mykje tåke.

Juryen valde å avlyse rennet rundt ein halvtime før skiskyttareliten skulle stå på startstreken.

– Det er veldig synd for oss som arrangør at renn blir avlyst. Vi synest først og fremst synd på utøvarane og fansen som hadde kome hit til trass for det elendige vêret, seier sjef i Holmenkollen Skifestival, Stefan Marx, til NTB.

Rennet skal etter planen heller gå fredag, men tidspunktet er ikkje klart. Dermed må Ingrid Landmark Tandrevold og resten av skiskyttarane vente ein ekstra dag før dei får konkurrere i den første konkurransen etter VM i Nove Mesto.

Publikum som torsdag måtte reise heim får også ein ny moglegheit til å sjå verdas beste skiskyttarar for både menn og kvinner fredag.

– Dei som hadde billett i dag, får en billett til i morgon som erstatning. Vi har heldigvis litt plass i anlegget då, seier Marx.

Han var ikkje sjølv involvert i avgjerda om å avlyse rennet.

Herrane skal også etter planen konkurrere fredag.

– Det vi har fått frå meteorologane ser lovande ut. Då skal vêret lette frå lunsjtid. Dermed gledar vi oss til fine renn i morgon, seier han.

Laurdag står fellesstart for både kvinner og menn på programmet.

(©NTB/Discovery)