Bisarr hending: Ivrig flaggberar mista gifteringen i Seinen

Under opningsseremonien av OL i Paris kunne ein sjå høgdehopparen Gianmarco Tamberi vifte entusiastisk med det italienske flagget i lag med fektar Arianna Errigo.

Opningsseremonien føregjekk på Seinen i styrtregn, noko som skapte problem for Tamberi. Gifteringen hans sklei nemleg av fingeren hans, spratt utanfor kanten av båten og ned i den parisiske elva.

Tamberi tok til Instagram for å beklage til kona.

– Eg er lei for det, kjære. Viss du vil, kastar vi din i elva også, slik at dei er saman for alltid. Då har vi ein unnskyldning til å fornye løfta våre og gifte oss på nytt, skriv italienaren under eit bilete av han og kona.

– Eg skal kome heim med endå større gull.

Verda sperra auga opp for Tamberi under OL i Tokyo, då han og Mutaz Essa Barshim valde å dele OL-gullet i høgde. Dei hadde begge hoppa 2,37 meter, men reiv tre gongar på 2,39 meter.