Angrar på Stöckl-kommentar: – Ikkje nødvendig

Fredag sat landslagstrenar Alexander Stöckl seg ned i NRK si Dagsnytt 18-sending for å snakke om bråket som har vore rundt det norske hopplandslaget den siste tida. Det fekk skihoppar Johann André Forfang til å reagere.

– Det var ikkje avtalen. Han får styre på. Det er vanskeleg å synse noko rundt det før ein veit kva ein skal seie. Han er på ein sympatirunde i media, sa Forfang til NRK.

Ifølge Forfang hadde landslagshopparane og Stöckl eit møte der dei vart einige om å berre uttale seg om sport i media, og halde bråket internt.

Før laurdagens skiflyging i Oberstdorf beklaga Tromsø-hopparen kommentaren.

Stöckl kalla kritikken frå Forfang «urettferdig».

– Eg stiller opp for media, slik eg alltid har gjort. Eg blei bedt om å kome hit og det er difor eg kom. Det er noko eg berre må gjere, som ein del av jobben min. Det synest eg er veldig urettferdig å seie. Det følast vondt, rett og slett, sa Stöckl til NRK.

Landslagstrenaren var svært prega under Dagsnytt 18-sendinga.

– For augneblinken er eg ganske langt nede i kjellaren. Eg trur eg må ta vare på meg sjølv og familien for å sikre at eg overlever, sa trenaren.

Verken Stöckl eller sportssjef Clas Brede Bråthen er på plass under verdscuprennet i Oberstdorf i helga.

Fredag vart Noreg nummer to i superteam-konkurransen. Forfang meiner det norske landslaget har klart å vise seg fram innan sporten over tid no.

– Det følar eg vi har gjort sidan Willingen. Vi har pallplassar kvar einaste helg sidan. Eg føler hoppinga vår snakkar for seg, seier hopparen til Viaplay.