Slaktar eigen prestasjon: – Har vore for dårleg

Under OL i Paris fekk ikkje Sander Sagosen det heilt til å stemme. Han hadde ein målprosent på 37,5 og vart benka under fleire avgjerande situasjonar.

Stjernespelaren er ikkje nøgd med sin eigen prestasjon.

Sagosen har møtt kritikk frå fleire hald under OL. Max-ekspert Ole Gustav Gjekstad og Marit Malm Frafjord meiner også at stjernespelaren har prestert under sitt eige nivå.

– Han brenn mange skot og er litt stilleståande. Ein er ikkje vand med at han bommer på så mange skot, og litt av grunnen til det er at han bruker litt lang tid i skotavviklinga, seier Gjekstad.

– Han har mangla timingen og duellstyrken. Han har mangla mykje. Nokre gongar hamnar ein i ein slik periode som handballspelar, seier Frafjord.

– Det trur eg vi alle er einige om. Det har ikkje vore godt nok. Det står eg for. Det har vore for dårleg av meg. Eg er ein av dei som skal vere med å leie det laget her, og har ikkje treft nivået eg har ønska. Det er berre å beklage, seier han.

Sagosen er ein spelar mange er vand til å sjå heilt oppe i verdstoppen. Difor trur Gjekstad at bakspelaren har fått kritikk for prestasjonen under OL.

– Forventningane er skyhøge. Det er ingen anna norsk herrespelar som har så høge forventningar rundt seg. Han har bore det laget angrepsmessig, men no gjorde han ikkje det, seier Gjekstad og understrekar:

No vil Sagosen heim til Noreg og ta grep:

– Ein må puste med magen no, dra heim og evaluere. Så skal eg på treningsrommet for å jobbe.

Det overraskar Frafjord.

– Det verker som han er i fin fysisk form. Det er rart det med topphandballen: Kvifor speler ein kjempebra i éin kamp, så dårleg seks månadar seinare? Hadde ein visst kvifor hadde det vore fint, seier ho.