Noreg rysta Frankrike: – Overraskande

Måndag kveld valsa Noreg over dei regjerande olympiske meistrane Frankrike.

– Det er berre å ta av seg hatten, la Discoverys handballekspert Ole Gustav Gjekstad til.

Laga gjekk til pause til stillinga 16-11 til det norske laget, og sjølv om Frankrike klarte å krype innpå Noreg i andre omgang, klarte Jonas Wille sine menn å halde franskmennene unna og gå sigrande ut av oppgjeret.

Tidlegare landslagsspelar Ole Erevik var svært imponert over det det norske laget viste.

– Dette var den første ordentlege testen, og dei bestod med glans. Dette er ein av dei betre landskampane eg kan hugse, seier tidlegare landslagsspelar Ole Erevik, som måndag gjesta Discoverys studio.

OL-debutantane Simen Lyse og Tobias Grøndahl var også sentrale i sigeren. Dei noterte seg fem mål kvar.

– Vi gjer det vi blir einige om, og det viser litt kvaliteten som ligg i gruppa, seier Grøndahl til Discovery.

I Discoverys studio var dei imponert over det OL-debutantane viste.

– Grøndahl er uredd, har nasa mot mål, tar ansvar og tør å setje seg sjølv i situasjonar der han skal avgjere. Lyse har også litt av det same. Han er uredd opp mot verdas beste forsvarsspelarar og dunkar ballen i mål. Det er ein god kamp av han, seier Erevik.

Dei norske gutane opna kampen mot vertsnasjon Frankrike på best mogleg vis, og kunne gå til pause med ei femmålsleiing.

– Det er ei positiv overrasking. Eg hadde ikkje sett for meg at Noreg skulle gå ut og dominere kampen i dei første 30 minutt. Jonas Wille fortener også ein stor bukett med roser som har satt opp laget som han har gjort, og førebudd laget slik han har gjort, sa Erevik i pausen.

– Frankrike gjer utruleg mange tekniske feil, og det er også framprovosert av eit godt forsvar av Noreg.

Frankrike tapte opningskampen mot Danmark. Frafjord trur det kunne vere med å påverke prestasjonen deira mot Noreg.

– Det verker som dei begynner å bli litt nervøse. Dei har ikkje kniven på strupen på å gå vidare, men for å få ein lettare motstand i ein kvartfinale.

Då laga returnerte etter pausen klarte Frankrike å redusere leiinga til ei tremålsleiing etter kort tid.

Ved slutten av omgangen slo Noreg hardt tilbake igjen, og auka leiinga ytterlegare etter at Kristian Sæveraas stoppa mange av Frankrike sine forsøk på scoring.

– Den kampen han leverer i dag – han leverer redningar på kritiske tidspunkt for Noreg som er fullstendig kampavgjerande, seier Erevik.

Det var eigentleg ikkje Sæveraas som skulle starte i mål. Bergerud stod på laguttaket, men like før start fekk Sæveraas beskjed om at han skulle på.

– Eg tok den moglegheiten med begge armane. Det var deilig å få ein god kamp, seier han til Discovery.

På onsdag møter det norske laget Ungarn, før Egypt og Danmark ventar.

Dei fire beste laga i kvar gruppe går til kvartfinale.