Lunde historisk – dette seier ho om framtida

Noreg vann OL-gull etter at dei slo Frankrike 29-21 i finalen. Dermed vart målvakt Katrine Lunde historisk. Ho er nemleg den første norske kvinna gjennom tidene som har tre gull i sommar-OL.

– Det er fantastisk å ta gull i dag. Eg er kjempestolt, seier Lunde til Max.

Fleire andre handballprofilar, blant anna Linn-Kristin Riegelhuth Koren, Karoline Dyhre Breivang og Marit Malm Frafjord, står med to OL-gull. No har Lunde tatt over trona åleine.

Lunde er den eldste av alle målvaktene i OL, men det har ikkje stoppa ho – langt ifrå. Ho er den målvakta med høgst redningsprosent under OL.

Under kampen mot Frankrike enda ho opp med ein redningsprosent på 38.

Veteranen er usikker på kva som er bakgrunnen for at ho har klart å halde det høge nivået gjennom leikane.

– Sei det. Akkurat no berre cruiser eg litt.

Gro Hammerseng-Edin, som gjesta Max-studio under finalen, har spelt med Lunde i ei årrekke.

– Det er vanskeleg å finne ord som er dekkande for det ho har gjort over ein så lang periode. Ho er den som har vore med og prega norsk handball sin suksess aller, aller mest.

Stine Bredal Oftedal har varsla karriereslutt, medan Lunde tidlegare har uttalt til Max at ho kjem til å halde fram i klubben Vipers.

– Eg har kontrakt der litt lenger.

Ho er derimot heilt klar på éin ting: Det blir ikkje OL i Los Angeles om fire år.

– Nei, svarar Lunde kontant på spørsmål om 2028.

– Heilt sikker.