Får testa formen i OL-generalprøve: – Blir ein god referanse

Tysdag kveld får begge handballandslaga ein test før opningskampen i OL i Paris, då dei begge speler landskamp i Gjøvik.

På motsett banehalvdel av handballjentene står Danmark:

– Vi veit at dei er eitt av dei beste laga i verda i dag. Dei er ein medaljekandidat, og potensiell OL-vinnarar, seier landslagssjef Thorir Hergeirsson til Discovery.

– Det blir ein god referanse på kvar vi står få dagar før OL begynner. Vi kjem til å ha eit stort fokus på vårt eige spel, og det vi har jobba med, seier Hergeirsson og held fram:

– Vi skal jobbe med den vektlegginga vi har hatt både i forsvarsspelet og angrepsspelet vårt, for å sjå korleis det fungerer. Så gjeld det også å jobbe med løpsfasen, kontringsspel og returspel.

Handballjentene skal også til Danmark for å spele kamp torsdag.

– Vi kjem til å ha fokus på ting vi ønsker å jobbe med fram til det verkeleg starter, men vi vil jo vinne. Det er to lag som kjenner kvarandre godt, og som absolutt ikkje vil tape, seier Katrine Lunde.

Kvinnene er ikkje dei einaste som skal få testa forma kort tid før OL. Også herrane skal spele kamp tysdag kveld. Dei får testa seg mot Spania, som kan bli ein potensiell motstandar i OL-sluttspelet.

– Det er ein motstandar vi har møtt ein del gongar, men også ein vi har slitt litt med. Dei speler litt annleis forsvarsspel enn det vi som oftast møter. Det blir spennande, seier Sebastian Barthold.

Barthold trur begge lag har kvar sine fordelar i oppgjeret.

Herrane har vore samla i litt over ei veke før kampen mot Spania.

– OL-oppkøyringa har vore veldig bra til no. Vi har fått pusta litt mentalt, slik at vi kjem inn i veka med eit mentalt overskot, samtidig som vi har trena bra fysisk. Vi held fram der vi slapp, seier Sander Sagosen.

Under OL-oppkøyringa har dei spelt fleire interne kampar, men ikkje nokre eksterne.

– Det er ikkje heilt det same å spele internkamp, som å møte ein annan motstandar. Eg trur det blir viktig å kome i kampsituasjon igjen, der ein må finne alle rutinane vi har under kamp. Vi får også testa litt nye variantar, spesielt angrepsmessig, og får samspelt spelarane, seier landslagssjef Jonas Wille.

Det er derimot ikkje lenge sidan damene fekk teste kampforma. Dei spelte to kampar mot Frankrike førre veke, som enda i éin siger og eitt tap.

– Både vi og Frankrike veit at vi ikkje viser alt i slike kampar, men vi fekk veldig god kamptrening, utan å få nokre svar på kor vi eigentleg står, seier Bredal Oftedal.

Kapteinen måtte stå over kampane på grunn av ein irritasjon i eit tå-ledd.

– No går det veldig bra. Eg er fullt tilbake, opplyser ho.