Solbakken kjem med skadeoppdateringar: – Blir sett på

Under kampen mot Færøyene fekk Erling Braut Haaland seg ein smell. Stjernespissen trakka feil i sluttminutta då han kasta seg fram mot mål, i håp om å føre Noreg opp i ei 3-0-leiing. Haaland vrei seg i smertar, men kom seg opp igjen og spelte ferdig kampen.

Til TV 2 fortalde landslagslege Ola Sand at City-spelaren fekk ein vriding i ankelen.

Landslagssjef Ståle Solbakken fortel på ein pressekonferanse fredag at han ikkje er særleg bekymra for at ankelskaden skal vere noko alvorleg.

Haaland er planlagt å vere med i troppen som møter Skottland søndag. Det er Noreg siste kamp i EM-kvaliken.

Martin Ødegaard meldte forfall til landslagssamlinga, men var til stades under kampen mot Færøyene. Arsenal-spelaren har også stått over fleire kampar for klubben den siste tida.

– No kjem eg frå ein tre kvarters prat med Martin. Han har det betre og betre, og så trappar han gradvis opp, seier Solbakken.

Klubben har ikkje gått ut med kva som plagar Ødegaard heilt konkret, men han har tidlegare hatt problem med hofta, og britiske medium har meldt at han fekk ei hjerneristing på trening.

– Det har vore meir eller mindre tre veker utan noko særleg trening, så det er viktig å ta steg for steg. Så håper nok både han og Arsenal at han er tilgjengeleg for Brentford-kampen.