Solbakken bekreftar: Dette er Noregs keeper i dei komande landskampane

Førre veke vart det klart at Ørjan Håskjold Nyland måtte melde forfall til dei komande landskampane grunna skader.

– Vi visste at Ørjan var usikker då vi tok ut troppen, og no viser det seg at han treng meir tid før han er klar for spel, skreiv Noregs Fotballforbund i ei pressemelding då.

Onsdag vart det klart at Mathias Dyngeland får tilliten i buret mot Færøyene, medan Egil Selvik får stå mot Skottland. Det bekrefta landslagssjef Ståle Solbakken på ein pressekonferanse.

– Det er to keeperar med litt forskjellige styrkar. No har Egil vore med litt lengre enn Mathias, og fekk 45 minutt i ein landskamp tidlegare, så det er dumt å seie at eg rangerer Mathias framfor Egil når Egil står mot Skottland, men samtidig er det to jamne keeperar, så difor gir vi dei begge moglegheita i kvar sin kamp.

Selvik gjorde sitt første inntog på landslaget hausten 2022, men står berre med éin landskamp for Noreg mot Jordan i september. Debuten kom sju og eit halvt år etter at Haugesund-keeperen debuterte for Noregs U19-lag mot Polen i februar 2016.

Solbakken bekreftar også at Erling Braut Haaland kjem til å vere på bana mot Færøyene. Om han startar eller kjem inn frå benken, opplyste ikkje Solbakken om.

Noreg speler landskamp heime mot Færøyene torsdag. Tre dagar seinare ventar Skottland borte til siste oppgjer i den ordinære EM-kvalifiseringa. Der er Noreg allereie slått ut, men har likevel framleis ein teoretisk sjanse til å kvalifisere seg til neste sommars sluttspel i Tyskland. Noreg er avhengig av hjelp frå andre lag for å kunne få ein ekstra moglegheit via eit omspel i Nations League.