Imponert over Brann sitt eventyr: – Ser på kvinnene som inspirasjon

Onsdag kveld møter Brann Barcelona i kvartfinalen i Champions League. Det synest den tidlegare Brann-spelar David Møller Wolfe er rart å tenke på.

Kampen er den første av to oppgjer. Brann skal først spele på heimebane, før dei reiser ned til Barcelona veka etterpå.

Wolfe spelte sjølv i Brann frå 2020 til 2023, og er svært imponert over kva kvinnelaget har fått til. Det er han ikkje åleine om.

At herrane ser til kvinnene for inspirasjon meiner AZ-spelaren er riktig steg innanfor fotballen.

– Det er den retninga ein skal gå. I Bergen har dei fått til noko verkeleg spesielt, og eg trur heile Noreg ser på det og håpar på å få til det same med sine lag.

Herrelaget til Brann har også fått det til å stemme i det siste. I fjor tok dei seriesølv, same år som dei rykka opp frå OBOS-ligaen. Sjølv om Wolfe ikkje lengre er Brann-spelar skal han uansett følgje gamlelaget tett i den komande sesongen i Eliteserien.

– Om eg ikkje får sjå kampane live, så ser eg dei i reprise.

– Dei seier sjølv at dei vil bli betre enn dei var i fjor. Det har eg full tru på at dei klarar, seier Wolfe og held fram:

– No har eg blitt Brann-supporter, og ikkje spelar. Vi supporterar forventar at dei går ut der, er seg sjølv og underheld oss bergensarar. Då har dei gjort jobben sin. Så tel ein opp poeng til slutt, men eg trur dei kan kome på ei veldig høg plassering i år også.