Glimt hentar spelar frå 2.divisjon: – Trur ikkje på det sjølv

Stian Kristiansen signerte tysdag morgon kontrakt med Bodø/Glimt.

Det opplyser klubben i ei pressemelding.

– Å ta på Glimt-drakt har eg alltid drøymt om, sa midtbanespelaren då han fekk utlevert drakta.

Kristiansen har spelt for 2.divisjonsklubben Junkeren. Der har han gjort det så bra at Glimt kom på bana.

– Dette har han verkeleg fortent, og det er svært gledeleg at vi no har lykkast med å utvikle ein spelar til Bodø/glimt, seier den gamle klubben i ei pressemelding.

24-åringen fortel til klubben at han har vanskeleg for å tru at han no skal vere ikledd gul drakt i Eliteserien.

– Beskjeden kom veldig brått på. Eg trur ikkje heilt på det, sjølv om eg sitter her i gul drakt.

Helgelendingen har ikkje spelt i Eliteserien før, men nivået er likevel ikkje heilt ukjent for han. Han har fleire gonger trena med Glimt på Aspmyra.

– Dette blir noko heilt anna. Det er mange, mange hakk opp for meg. Heldigvis har eg vore her litt tidlegare, så eg veit kva eg går til.

Ifølge klubben er det hard konkurranse på midtstopparplassen.

Isak Helstad Amundsen har vore ute med skade i lengre tid, så Brede Moe, Marius Lode og Odin Bjørtuft har vore dei sentrale forsvarsspelarar i klubben.

– Eg reknar ikkje med å spele frå første dag. Det blir ein hard kamp, men eg er her for å gjere mitt beste.

Glimt møter Pyunik i returoppgjeret i kvalifiseringskampen i Conference League torsdag. Klubben opplyser ikkje om Kristiansen allereie er aktuell til då.