Djokovic vann gjæv pris – slo Haaland

• Hald deg oppdatert på sport med Eurosport-appen. Last den ned i App Store og Google Play

Novak Djokovic vart kåra til årets mannlege utøvar på Laureus Sports Awards. Det er femte gong han vinn prisen.

– Eg har hatt gåsehud den siste timen av å sjå utøvarane her og rundt omkring i verda for den innverknaden dei har hatt på sporten. Fortsett å inspirere folk rundt omkring med kvar einaste bevegelse, hopp, pasning, slag og ord. Gratulerer til alle dei nominerte og vinnarane i kveld, sa Djokovic.

Tennisspelaren står med 24 Grand Slam-titlar gjennom karrieren. Tre av dei kom i fjorårets sesong.

Han konkurrerte mot Armand Duplantis, Noah Lyles, Lionel Messi, Max Verstappen og Erling Braut Haaland.

Haaland var ein stor bidragsytar i Manchester City som i fjor vann både Premier League, Champions League og FA-cupen. Det har han vunne ein rekke prisar for, blant anna under Globe Soccer Awards i januar.

Manchester City var også nominert til årets lag, i lag med blant anna Viktor Hovland sitt Ryder Cup-lag. Der gjekk Spania sitt kvinnelandslag som gjekk til topps i VM av med prisen.

Fleire store stjerner var til stades på prisutdelinga, blant anna Bolt, Tom Brady, Rafael Nadal og Jude Bellingham. Sistnemnde vann pris for årets gjennombrot.

Fotballstjerna Aitana Bonmatí vann årets kvinnlege utøvar.

Laureus Sports Awards blir omtalt som Oscar-utdelinga i idrett.