Braathen bekreftar comeback: – Betyr mykje

• Hald deg oppdatert på sport med Eurosport-appen. Last den ned i App Store og Google Play

– Det eg føler er glede og kjærleik. Eg brenn for å representere brasilianar i ein ny idrett. Det er veldig stort for meg. Eg er veldig glad for å kunne representere landet mitt, seier Braathen til den brasilianske avisa Globo.

Braathen har brasiliansk mor og kan difor byte kva nasjon han representerar.

– Det viktigaste målet for meg er å bringe brasiliansk kultur, dans og følelsar til vinteridretten. Eg vil vise at sport er for alle, og det skal eg gjere ved å stå på ski for Brasil. Eg er veldig spent på moglegheitene for å vinne konkurransar og bere det brasilianske flagget på ryggen, seier Braathen til avisa.

TV 2 omtalte intervjuet først i Noreg.

Torsdag har Braathen invitert til pressekonferanse for å snakke om skiframtida.

Avisa skriv at Braathen kjem til å representere Brasil frå og med 1. juli.

Braathen annonserte to dagar før sesongstarten at han la opp i ein alder av 23 år. Årsaka var ein årelang konflikt med det norske skiforbundet.

Tidlegare lagkamerat Atle Lie McGrath jublar over at Braathen er tilbake.

– Eg synest det er gøy. Lucas er ein veldig god venn, og det å snakke om at han kjem tilbake no, kontra det å snakke om at han la opp, eller tok ei pause, er veldig stor forskjell. Før Sölden var eg veldig lei meg og synest det var ordentleg drit, seier McGrath til NTB og held fram:

– Det var supertrist, men då er det ein veldig stor gladnyheit at han no kjem tilbake. Og så er det då synd at han kjem tilbake for ein annan nasjon.